利物浦隊長謝拉特喺球場上表現勇猛、速度又快,而且腳腳七注,我求大俠仲以為佢同曼聯翼鋒基斯坦奴朗拿度(C朗)一樣鍾意揸辣車;但實情啱啱相反,早前佢就直認自己手車渣,舞唔掂架價值12萬鎊(約148萬港紙)嘅阿士頓馬田DB9,結果要將部車甩手。
「DB9太快揸唔掂」
喺英超搵食班球星人工高,周薪閒閒哋都過10萬鎊,所以買靚車完全唔使睇價錢,噏得出嘅名車好似係阿士頓馬田、法拉利、保時捷、賓利、寶馬、平治同埋勞斯萊斯等,好多球星嘅車房都有。其中阿士頓馬田係英國嘅國寶級跑車,仲經常喺電影《占士邦》系列出現,DB9系列更加係身份嘅象徵,揸出嚟肯定迷倒萬千少女、令不少少男羨慕又妒忌,試問班球星好似係C朗、林柏特、謝拉特同埋格連莊臣,又點會冇部傍吓身。
講到明係國寶級跑車,DB9嘅價錢同馬力都肯定有番咁上下,喺香港賣到成240萬港紙,而喺英國雖則平一截,不過亦要成150萬港紙,至於由0至100公里只係需要5.1秒,極速仲去到300公里㖭。雖則呢部車咁正,但係謝拉特就話自己無福消受。年薪達600萬鎊嘅謝拉特咁話:「呢架DB9實在太快,要世上最好嘅司機先揸得掂,好可惜我手車麻麻。」
謝拉特早前話下年可以幫利物浦同埋英格蘭國家隊攞英超同埋世界盃,俾人話佢癡人說夢話,但球場係夢工場,既然禾夫斯堡攞到今季德甲,希臘亦喺04年歐國盃封王,真係冇嘢係冇可能。不過去到現實生活,謝拉特就唔敢講夢想,見自己揸唔掂部超級跑車,嗱嗱聲賣咗佢。無他嘅,生命冇TakeTwo嘛!呢個世界唔係人人好似C朗咁好運,炒咗架法拉利,居然一啲事都冇,仲可以施施然行出車。