香港兩大電視台近年CCTV化，亞視毋須多講，六叔掌管嘅TVB近年都好「紅」，早前六點半新聞報道冇播趙紫陽回憶錄面世嘅新聞，就令無綫贏得CCTVB嘅「美譽」。六四在即，前晚亞視播出「無署名」嘅六四20周年特輯，唔少觀眾睇完覺得內容和稀泥兼傾向官方，網民仲大鬧唔播好過播，講到明會向廣管局投訴。
以「風波」形容六四
香港兩個收費電視台有線同now財經新聞台，都有製作六四特輯。但兩大免費電視台相對就顯得無聲無氣，前晚亞視終於播出半個鐘嘅六四特輯上集，但就安排喺晚上11點推出，唔少人都miss咗。有睇過嘅觀眾大部份都唔收貨，連八方都收到有朋友打嚟問候亞視。
啲觀眾話，雖然當中有市民擋坦克片段同前學運領袖王丹嘅訪問，但就明顯緊跟中央，例如將軍隊鎮壓同殺人稱為「清場」，以「風波」形容六四事件，最離譜係用非常多篇幅讚中央政府家幾咁好，似乎係歌功頌德特輯多過六四回顧，啲網民反應仲大，聲言會大舉向廣管局投訴。但噚日星期日，廣管局方面話未有投訴數字。
仲離奇嘅係，通常新聞特輯都會出番負責採訪嘅記者、編輯、攝影等等工作人員嘅大名，但亞視呢個特輯好神秘。據《明報》前日報道，亞視新聞部前線編採人員都唔知有呢個特輯，知情者只得新聞部高級副總裁梁家榮同副總裁譚衞兒，好詭秘。其實，香港嘅電視台播一個六四特輯都會成為新聞，呢件事本身都已經值得反思。
89年為亞視喺北京採訪六四嘅謝志峰睇咗個特輯嘅後半集，佢嘅評語係內容比較mild（溫和）。佢仲好包容咁話，亞視可以做到兩集六四特輯已經相當唔容易，相信新聞部中人承受唔少壓力。
至於近期贏得CCTVB「美名」嘅無綫，據聞鐵定星期日（5月31日）晚喺《星期日檔案》播出六四特輯，探討年輕一代對六四嘅睇法。各界都金睛火眼實特輯內容，唔知到時會唔會重播新聞主管袁志偉當年同李鵬做嘅訪問呢？不過，單睇佢哋早前處理趙紫陽回憶錄呢單新聞嘅取態，八方不敢寄予厚望。
mailto:[email protected]