謝偉俊阿Paul入立法會之後好似內斂咗，冇咗法律超人嘅怒火。阿Paul噚日喺港台節目《舊日的足跡》自我剖白，話立法會始終要理性討論，喺議會只想做到似個有家室嘅男人，唔會周圍吊吊fing。佢澄清呢個字無不良含意，只係話做人要踏實啲，但唔排除仍然有不平事激到佢火山爆發，但再以超人角色出現機會好低，事關套制服已經收埋咗。
阿Paul97年同白姐姐註冊結婚，當時點解為一朵花放棄成個花園？原來佢當時搞緊居英權，想令當時仍然係女朋友嘅白姐姐同樣受惠。早前佢同白姐姐嘅花槍已經耍完，阿Paul冧滋滋話希望再同白姐姐走多20年喎。