自由黨「北辰中興」勢頭不俗，繼召集周一早餐會後，下一輪重整黨務工作係實行MentorScheme，約400黨員分成10組，每組都有個組長。黨高層同黨員透過10個組長互傳訊息，希望透過兩層架構加強向心力。
成立「青年自由黨」
呢種類似零售店區長式管理制度，據講係由經營G2000嘅田二少構思，有自由黨中人話田二少仲有其他大計，包括成立「青年自由黨」，吸收大學生同青年才俊入黨；主攻街坊派、有近萬成員嘅「自由之友」亦會重整旗鼓。另一大搞作係透過該黨關懷基金幫老弱人士做屋宇維修，力推此事嘅周永勤寄望甚殷，認為可以發展為一盤社企生意。
自由黨幾個支部下月中改選主席，有消息指田二少或不任西九主席，可能做個超然啲嘅位置。新界東可能有劇鬥，西貢方國珊對沙田梁志偉，前者係委任議員，近年冒起甚急，後者係民選議員兼地區工作老將，消息指黨高層希望以和為貴，正嘗試擺平。
田二少今日仲以個人名義喺多份報章登廣告，批評曾班子教育語言微調方案得不償失，發炮力度同大佬有得揮。