鬍鬚曾早排揸部「AM800」電動車出嚟主持呢部車嘅啟動禮，係咁意行咗幾十公尺路程。佢噚日喺個blog度自爆話，由於嗰架電動車做咗政府車，根據法例要有政府車牌先可以揸，為咗呢幾十米路程，佢老哥專登去考咗個政府車輛執照試，仲話考牌嘅政府物流處同事揸正嚟做，冇優待佢，詳細翻查咗佢嘅駕駛紀錄先畀佢pass。
有近40年駕駛經驗嘅鬍鬚曾話，首次揸電動車感覺一新，撻引擎按吓個掣就得，唔似一般汽油車，仲話如果唔係睇到「READY」字樣，都唔敢確定部車已經啟動，但當日只係揸住部車行咗幾十米，未過足癮，仲話好羨慕邱騰華可以揸部車四圍去。