儍強真係有名你叫，人家比喻緊明日嘅香港就係今日嘅芝加哥，上海擺到明要坐正成為當今美國嘅紐約，我哋就係要跟人家死撐，儍更更咁牛頭唔搭馬嘴，仲要話自己似倫敦多啲，如果要似倫敦，都似乎係上海似多啲，攞住黃埔江同泰晤士河與維多利亞港比一比，香港嘅Heritage感覺近乎零。
上海DNA裏面早已有成為金融中心及航運中心條件，只是被埋葬咗60年，現時屬政策配合一錘定音一觸即發。
我哋以前細細個要學普通話都要當係課外活動，自問到大個咗仍然只係講得半桶水，仍然有排學，啲細路細細個已經曉中文電腦，佢阿爸好明顯仲係用緊手寫板，假如自己唔係當年誤打誤撞入咗中銀，份工早就要日日撰寫中文投資研究報告，日日打到手抽筋，家可能仲儍過儍強。
衍生產品可大展鴻圖
香港大藍籌已經陸續部署回歸祖國懷抱，當恒生指數兩大單一股份支柱成份股滙控（005）、中移動（941）都話要回歸上海A股市場，即將於本港上市嘅AIA預咗亦會如滙控一樣回歸誕生地，香港人再死攬住大香港主義就猶如抱殘守缺，好似薰妮隻歌〈每當變幻時〉，歌詞中「懷緬過去常陶醉」、「韶華去，四季暗中追隨，逝去了的都已逝去」。
先搞清楚香港家最受熱捧嘅股票係來自邊度嘅企業，再睇清楚最想回歸內地上市嘅企業又來自何方，最後剩番低畀自己嘅又係邊啲股票，就不由得不打番幾個冷震。
無資源、無人才、無遠見，當連港交所（388）行政總裁都就嚟唔係香港仔，疑似內定嘅金管局總裁接班人，雖為土生土長香港人，卻要俾班議員七嘴八舌趕盡殺絕判處死刑，總之來自特首馬房嘅就打死都唔畀佢上，係人才又如何，只怪特首把你株連，堪稱衰開頭。
香港又唔係毫無可取之處，本地嘅股票衍生產品咁成熟，斷估仍可大展鴻圖，最緊要人類仍然抽唔走「貪婪」嘅DNA；香港品牌仍然係內地人眼中具產品信心保證嘅名牌，完善嘅文明與法治，就係我哋最大嘅資產，點解咁多內地人唔介意畀650萬肯投資移民嚟香港，就知箇中優勢理據，點樣配合，唔使畫公仔畫出腸啦！
胡孟青