有日坐喺自己《蘋果日報》財經組個位度上網睇blog，見到blogger「荒木茂」寫政府對付豬瘟用咗「流感大流行」呢5隻字，因而覺得政府硬膠。
政府架床叠屋
因為「流感」呢兩字，其實係「流行性感冒」縮寫，所以流感後再加「大流行」簡直係架床叠屋兼無謂。見到有人對語言咁執着，孫柏文當然即刻想啲後生傳媒工作者學吓。有見及此，就叫坐我隔籬嘅同事高明輝睇睇。
點知因佢check緊自己買咗嘅衍生工具收市價，仲要越check越現青筋，我要用盡三寸不爛之舌，佢先肯睇。佢睇完就問我：「咁點呀？」我就答：「你唔覺得重複咗咩？真係好難諗個比流感大流行更無謂嘅詞彙。」
到呢刻，高明輝已走番去睇啲衍生工具收市價，但唔知係咪個問題觸動到佢，佢好激動咁企起身話：「有！就係『窩輪大縮窩』！」
窩輪意義新解
我即刻問：「邊度有重複？窩輪嘅窩只係warrants嘅war，縮窩嘅窩就係引伸波幅中impliedvolatility嘅vol。」
高：「窩輪唔係warrants，其實係一句說話嘅縮寫。」我問：「咁窩輪究竟係乜嘢嘅縮寫呀？才子……」高答：「窩輪其實係14隻字。就係『街貨一多即縮窩、買咗好似俾人輪』！」
後生可畏，才子果然係青出於藍勝於藍。
孫柏文
http://phatdat.blogspot.com