【本報訊】要食得好，又要價錢有個譜，在香港也不難找得到。對於抵食之選，城中食家各有心水。蔡瀾首選是尖沙嘴的京菜鹿鳴春，余健志則介紹同區的日式餐廳Yamm。不過有食評人指出，香港租金持續高企，食肆水準有下降趨勢。
「雖然話金融海嘯，但係我唔覺香港嘅食肆有減過價。好嘅餐廳係唔會減價嘅，如果要慳，咪少啲去囉！」蔡瀾說，看不出抵食的餐廳受到經濟衰退影響，以鹿鳴春為例，現時還是晚晚爆棚，「如果講經濟又好食嘅話，我會推薦鹿鳴春，食物豐富，價錢合理，佢哋嘅烤鴨仲好食過北京嗰啲。」
新派食評人余健志也推介尖沙嘴區的食肆，他認為美麗華酒店的日式餐廳Yamm很抵食，「一個自助晚餐大約每位500，食材一流。」余健志有個「食好嘢」攻略，就是專挑午餐時段幫襯，「好多著名食府喺lunch時間都會推出優質嘅招牌菜，但係價錢比較平。」
偏遠小店美味實惠
《酒經月刊》總編輯劉致新埋怨香港業主拖低了食肆質素，「我發覺香港食肆嘅質素低咗，原因係租金太貴，客人又冇要求，店舖唔肯入好材料。」要確保食品有質素，劉致新會先了解食肆廚師的來歷，例如日本餐館是否由日本人主理；而一些好餐館為了逃避貴租，會選擇在較偏遠的地區開舖。
食家劉健威說，追求味美又實惠的食肆，不妨造訪一些偏遠的小店，例如粉嶺聯和墟的客家菜新漢記，以及九龍城的創發潮州食店。