早前有幸與「現在台」高層午餐，大家傾開香港球迷果然有福，因為香港係全世界英超直播場數最多嘅地方，周日英超煞科，全部10場比賽都有直播，當然喺呢啲場次搵冷膽、希望食吓尾糊。
英格蘭球隊一向對球迷甚重視，尤其係主場謝幕戰，所以搵兩個主隊大炒波膽；首選阿仙奴主場對史篤城，阿仙奴篤定獲得第4位，史篤城又成功護級，今仗冇咩好爭。
不過，以上仗阿仙奴作客曼聯所見，眾兵工廠小兵未有鬆懈，差啲贏埋曼聯㖭。阿仙奴近季總有一、兩場主場大勝對手，但今季仲未開過「主其他」，就揀呢個18倍波膽。
曼城炒保頓冇難度
另外，就捧埋曼城大勝保頓，曼城有富豪入主，今季只得中游成績，肯定唔滿意，難得領隊曉士未被炒，眾將點都落力打埋呢場；保頓護級成功後，走勢放緩，連續4場和波，但上仗對侯城，唔係門將積亞基連倫上身，根本就輸埋，今次就博曼城贈保頓4蛋，取4:0呢個25倍波膽。
意甲方面，同日都有啲風流波，「小斑馬」錫耶納主場對「真斑馬」祖雲達斯；祖記剛炒掉雲尼亞里，簡直就係去瘀血，往績亦食硬錫耶納，揀客軍贏3:0正路。
文：牽牛