白鴿黨兩年前區選賴晒嘢，痛定思痛，爭取時間養兵，噚日召集幾十個社區主任舉行宣誓儀式，當中唔少係民主老餅，輸完又嚟過，但亦有不少新血，仲有個「民主神童」！
民主神童名叫鍾錦麟（Ben），20出頭係嶺大文化研究二年級生，被稱為民主神童其實都同八方有啲淵源。話說00年阿Ben12歲讀中一時，竟然單拖去立法會，現場睇民主黨議員宣誓就任儀式，八方當年喺立法會曾訪問佢，9年來佢對政治興趣有增無減，曾幫公民黨余大狀助選，又參與創立中學生聯盟，後來索性加入政黨。
師傅讚政治早熟
阿Ben師傅、西貢區議員范國威稱，阿Ben相當「政治早熟」，對政局、時事分析頭頭是道，因此黨內綽號叫民主神童。阿Ben同八方重遇，話已在將軍澳做咗近兩年地區工作。佢從政意願強烈，相信遲早參選，過來人范國威則話參選要玩協調遊戲，唔係話選就選咁簡單，神童都冇着數。