家經濟都未有乜起色，再加埋豬流感殺到，首當其衝嘅食肆幾難做，啲老闆都要諗計仔突圍。好似啱啱開咗一個禮拜嘅沙田凱悅酒店中菜廳「沙田18」大玩透明度，將全層中菜廳打造成一個開放式廚房，食客可以全程睇住廚師獻技，啲功架得唔得一目了然。
四大透明廚房
小妹早幾日走去開吓眼界，一入大門口，成個甜品廚房擺喺眼前，放咗各式各樣紅紅綠綠嘅甜品，最特別係中菜西煮嘅五粮液朱古力雪糕、木瓜雪耳雪糕，睇到眼定定幾乎撞到個廚師。小妹有眼不識泰山，佢原來係酒店嘅行政總廚張康民師傅，由佢一手一腳設計呢個開放式廚房，同食客打成一片。
張師傅笑笑口話，10年前喺北京凱悅開始搞開放式廚房，但沙田凱悅做得最徹底，將中菜廳打造成一個廚師舞台，分成麪食及餃子廚房、燒烤廚房、鑊廚房、甜品廚房，拆去石牆改裝玻璃幕牆，等食客欣賞各大廚功架。每個廚房都由內地不同凱悅嘅星級大廚坐鎮，好似表演手拉麪嘅西安凱悅張陽師傅、北京凱悅屈友福師傅嘅北京烤鴨，睇到小妹好似劉姥姥入咗大觀園。
來自東莞凱悅嘅鄒奕鋒坐鎮中菜廳主廚，佢嘅拿手好戲當然係炮製正宗東莞家庭菜，即席喺鑊房開爐炮製寮步豆醬炆腩排、鬆蒸鮮膏蟹餅等東莞菜。佢又話有興趣嘅食客可即場偷師，學吓包餃子、手造拉麪。又睇又食又學，午餐人均消費120至200蚊，晚餐250至300蚊，都算抵吖。
電郵：mailto:[email protected]