官府日前出「封神榜」，18人升官發財，榜上無名者，就要坐多一會嘞。今次升為甲一級政務官嘅楊立門同張琼瑤，喺資深政務官中資歷排名分別只係第四同第六位，而第一至三位，分別係民政事務總署署長陳甘美華、食衞局常秘孔郭惠清同環境局常秘王倩儀，今次冇份升級，排第五嘅廉政專員湯顯明亦冇上榜。
政務官職系向來論資排輩，呢幾個AO前輩俾後浪爬頭，都算十分客氣，由於佢哋年紀都有番咁上下，有冇機會升做甲一級政務官，視乎能否把握最後機會。官場中人對呢幾個高官評價不一，不過升職嘅嘢好多因素，能力、運氣、際遇、待人接物缺一不可，隨緣啦。
至於資歷排第七、八、九嘅黃志光、區璟智同陳育德，一般估計區璟智最有機會升級，因為黃、陳都差不多夠鐘退休。