無綫日前安排近百位港女進行新一屆港姐首輪面試，仲邀請6位星級名師團，包括有攝影師男友，又學過攝影嘅港姐人馬謝寧、業餘拍友黃德斌、化妝師RickChin、攝影師蔡克信、時裝設計師鄧達智同WalterMa，齊齊擔任客席攝影師，可惜一眾參賽者質素奇低，令人睇到O晒嘴，謝寧同黃德斌等即使帶齊長短火各類攝影架生，亦同樣神仙難救。
爆瘡滿面油
噚日港姐大會派發命名為「星級名師鏡頭下的美麗新力量」嘅相片，幾位名師攝影風格迥異，殊途同歸係無法化腐朽為神奇。審美眼光甚高嘅鄧達智，竟然要為滿面油光、額頭谷瘡嘅佳麗、以及參賽者「露髀小鳳仙」留倩影，真係影到手震，尤其嗰位「仙姐」嘅前面頗難影得落手，加上佢着高衩小鳳仙裝配淺色絲襪露襪頭，咁奇異嘅fashion令鄧大師大開眼界，一於影佢後面，唔吼前面。
胳肋底飄香
至於RickChin就狂影佳麗大頭相，當中嘅「大汗徐淑敏」胳肋底飄香，大撻汗迹上埋鏡；蔡克信做足工夫打晒燈影着透視花裙嘅佳麗，無奈鴨仔難變天鵝；另一佳麗老翻黃宇詩有張pizza臉，謝寧惟有偏側45度角嚟影，博喺視覺上拉長佢條頸同影細啲個頭；黃德斌就全部影黑白相，玩黯黑唯美。睇嚟當日呢班名師團望見班佳麗已經滴汗，影完相都要搽吓藥油醫頭痛。