高官有喜！18個乙級政務官至常任秘書長嘅官員近日接獲升官喜訊，煲呔兩個愛將朱曼鈴同張琼瑤都榜上有名，其中Cathy朱更係升班超新星，係今次唯一一個冇經過署任就升正乙一級政務官嘅官員，有資格署任部門署長。
Cathy係煲呔做政務司司長時嘅新聞秘書，當時已獲煲呔賞識，佢現任民政事務局副秘書長，主打西九文化區，官場消息指呢份工應該係過渡性質，相信Cathy好快另有新任務。保安局署理常秘張琼瑤曾任特首辦署理常秘，舊年12月嘅泰國包機事件，保安局俾市民炮轟，大家以為張琼瑤要孭鑊，點知原來大步檻過仲有職升。
抗疫小隊長有回報
另一個升正常秘嘅仲有發展局楊立門，而臨危受命做港台署理台長嘅傅小慧，調離港台後任發展局副秘書長，今次由署理乙一級政務官升正，捱義氣後終於有回報。近期豬流感搞到滿城風雨，食物及衞生局副秘書長陳松青被徵召做「抗疫小隊長」，封鎖維景一役表現出色，今次升正乙級政務官，並不意外。