亞視之寶係乜？金像影后鮑姐固然係啦，另一樣相信係六四時，亞視記者喺天安門出生入死拍低嘅新聞片段。呢啲片係真正歷史紀錄，但亞視竟然有人話冇keep呢啲咁珍貴嘅新聞片！唔通已上繳中央台？
亞視六四片去咗邊？
八方收到風，話說有傳媒行家要製作回顧六四事件特輯，向亞視借用部份89年天安門新聞片，當中包括記者謝志峰撤離天安門前最後報道，點知亞視拖拖拉拉唔願回覆借唔借，搞咗幾日追到佢瘦先有個說法，有個職員竟然話佢哋冇keep到任何六四新聞片！
呢個講法，如果八方親耳聽到，恐怕驚奇到企唔穩，堂堂一個電視台竟然連咁緊要嘅歷史紀錄都唔留低，你估係普通人家屋企啲陳年錄影帶，見到封塵唔會翻睇嫌阻碇就叮走一筆勾銷？雖然亞視過去20年多次易主，但六四新聞片係無價寶，點都冇理由唔要㗎，求其丟落垃圾桶，對得住當年冒險報道嘅記者？有面目見香港人？
既然冇理由丟咗啲片，咁去咗邊呢？電訊魔童應該冇興趣，亞視被稱「中央十台」，可能上繳中央台啩，用嚟製作人民子弟兵平亂勝利20周年紀錄片都唔定，用香港電視台嘅片段，貨真價實，包保唔會俾人質疑造假。另一個可能係西環借晒嚟睇，大家知啦，呢啲禁片，內地冇得睇㗎。
謝志峰聽到亞視冇keep到當年新聞片呢個消息，有啲愕然咁話難以理解，如果真係冇留低歷史片段，「可能係想忘記啲嘢，唔係正常電視台做法。」八方噚日曾聯絡亞視新聞部話事人，想查詢點解唔keep啲片，究竟係冇地方擺定係有難言之隱唔方便外借呢？可惜冇回覆。
外事部：唔會唔keep
而亞視外事部發言人就話，新聞片一定唔會唔keep，指佢哋唔keep新聞片係無中生有好荒謬，亦冇管理層指示咁做。至於會否借出片段畀其他傳媒機構，佢話傳媒機構互借片段好普遍，但就冇講清楚借唔借出六四新聞片。
六四唔係八萬五，唔講不等於不存在，亦唔係粉筆字，抹咗就灰飛煙滅，就算丟晒啲片，人民都不會忘記。
mailto:[email protected]