美國信貸評級似乎都幾危危乎，因為標普將英國信貸評級展望由「穩定」調低至「負面」。英美兩國在今次金融海嘯中可謂難兄難弟，英國被評級機構咁搞法，估計美國遲早會遭同一命運。
評級憂慮開始籠罩股海，華爾街股市前晚下跌過百點，港股昨開市初段居然唔跌，星俠都覺奇怪！及至11時半左右大市沽壓才漸現，幕後大戶都算蠱惑。點解咁講？大戶於開市初段先撐起個市，因為一定有唔少散戶見隔晚美股下跌而「懶醒」開市即沽空，當個市不跌反升，係人都會疑惑，事關呢輪股海有乜壞消息都好，個市都多次唔跌兼勁挾向上，咁散戶見外圍下跌而港股卻獨自上升，個心一慌，多數會將沽盤平倉，免得葬身勁挾當中。當淡友被「篩」走後，個市才急跌，幕後大戶呢一招，真係玩死唔少淡友散戶。
「染藍」在即嘅華潤電力（836），昨逆市上升3.5%，收報16.50元，似乎跌市中公用股真係起避險作用。
自5月份至今，華潤電力走勢大部份時間真係麻麻，於月初升至高位17.90元出現黃昏之星形態後反覆調整，跌至本周初15.60元後才喘定。
華潤電力昨以大成交重越3條主要平均線，短線應已見底，可再挑戰本月初高位，突破可上望20元，以15元止蝕。
方星俠