鄭大班牽頭嘅新電台開台只聞樓梯響，佢噚日喺《信報》專欄慨嘆自己所託非人，當初搵林偉強幫手，諗住佢係坪州鄉事會主席，冧得掂班村民，開綠燈畀大班喺島上興建發射站，點知小強原來假傳聖旨，去年5月表態支持大班後，遭過半數鄉事會委員踢爆佢事前冇諮詢，之後小強急急轉軚反對建發射站。雖然小強極速變臉，不過有鄉紳咬住唔放，聽日會搞村民大會聲討小強咁話。
呢單嘢餘波未了，鄉事會成員去年12月曾去信新界王發叔，要求佢老人家出手阻止大班興建發射站外，又狂數大班，點知封信輾轉落到大班手上。大班今年2月出律師信要求居民道歉，又要發叔分擔15萬元律師費，呢條數真係好襟計。