以往麥家琪給人感覺是年輕性感，跟賢妻良母扯不上關係。但自從07年生了Johan後，無論自己及周遭都覺得她變了，照顧兒子親力親為，無論生活或學習安排得井井有條，活脫脫是個賢淑媽媽。她最大希望不是要囝囝做蓋茨咁有錢，而是學他能利用自己長處積極行善，對毫無關係的人也伸出援手、無私助人。
記者：林佩婷
攝影：楊錦文
場地：香港凱悅酒店Cafe（37237952）
為兒改陋習
曾看過家琪以前的訪問，說她有過一段反叛歲月，圈中人吸煙喝酒的習慣她都有，但自從有了Johan，連脾氣都收斂了。「我本身有食煙，陀仔嗰陣戒咗，舊年曾經有段時間食返，雖然食完後會立即洗手刷牙，但每次食完個心都好唔舒服，最後為咗囝囝徹底戒咗。」
全天候貼身照顧
事實是何止一根煙！自從有了Johan，心態也不同了，相比工作，情願選擇貼身照顧BB，緊張情況甚至連老公都曾經呷醋。「我有時依然會去登台、拍廣告，但家唔能夠一日十幾個鐘去拍戲。好多人話我放太多時間落個仔度唔肯放手，好似同佢冲凉、煮飯餵飯、帶佢返學等等。甚至覺得我縱個仔，不過我唔同意，因為呢啲全部會成為自己嘅回憶，我唔想Miss。而且我覺得自己係嚴母，每當佢喺街發脾氣，我就會畀10分鐘時間緩衝，否則就返屋企。教小朋友我覺得有啲嘢係唔可以妥協，所以每當佢趴地，我就唔會理佢，等佢自己無癮。」
從小教育
講到湊仔，家琪覺得頭14個月最難捱，到15至19個月最好玩。而且她亦好有計劃去教育囝囝。「佢3個月大，我就開始畀佢睇FlashCard，6個月就上Playgroup。我亦睇咗好多書，有資料話越早Flash越好，至於咁早上Playgroup，係想佢聽多啲音樂，接觸多啲人，性格都穩定好多。我唔係想佢做超人，只係希望佢識多啲嘢，同人溝通多啲。囝囝唔多愛玩玩具，反而鍾意睇書，所以成日去書店或圖書館。當瞓覺嗰陣就放本書喺床頭叫我幫手揭書，呢啲都係從小培養嘅成果。」
做人要有束縛
現時Johan除上Playgroup外，還會學習普通話及英文等實用技能。學校方面，她決意選擇傳統學校。「我覺得人係要有束縛嘅，傳統學校有一定規矩，況且細時無壓力，大咗點做嘢？無人會擔保你一世都順利。我唔使佢讀書好叻，最緊要有正確品德同良知，家社會風氣好差，一句『我鍾意呀』就以為咩都得，最常見吸毒、飲酒、亂搞男女關係，都因為佢哋唔識諗，我絕對要避免呢啲情況。我希望個仔以蓋茨為目標，唔係話想好似佢咁有錢，而係想佢多做善事，即使同佢無關係嘅人，都依然肯照顧。」
