好了，欣賞歐洲冠軍聯賽一整年，終於等到被喻為世紀夢幻決賽的戲碼，西甲班霸巴塞隆拿大戰英超之冠曼聯將於下周四（28日）凌晨上演，球星技術超班就無謂多講了，最估不到是兩隊陣營居然隱藏着多張明星臉，究竟是由張家輝夥拍劉以達的攻擊型中場夠勁，還是田雞搭曾鈺成的前鋒最銳利？球迷影迷通通都不能錯過！ 撰文：蘇芬妮
－巴塞隆拿陣營－
領隊哥迪奧拿（JosepGuardiola）
永遠整齊西裝，面臨大敵從容不迫的氣概，驟眼看巴塞少帥哥迪奧拿跟英國型男祖迪羅（JudeLaw）形神俱似，唯一不同的相信是哥迪奧拿雖然靚仔，但球場外似乎沒太多花邊新聞。
右閘丹尼爾（DaniAlves）
由西維爾過檔的丹尼爾，改善了巴塞的側擊，跟美國總統奧巴馬（BarackObama）的「Change」理念一致。弊在因累積黃牌決賽得個睇字，情形有如奧巴馬救市咁款──愛莫能助。
中場恩尼斯達（AndresIniesta）
兩位「達哥」真係可以稱兄道弟，「夢遺大師」劉以達神龍見首不見尾，恩尼斯達球場內外左穿右插，同樣令人聞風喪膽。遺憾係恩尼斯達24歲就冇晒頭髮，踢到曉飛又如何？
中場沙維（XaviHernandez）
11歲在魯營球場打滾，18歲才在西甲放光芒，沙維也算是大器晚成；羅拔唐尼（RobertDowney）出道多年，一直鬱鬱不得志，直至去年終憑《鐵甲奇俠》（IronMan）吐氣揚眉，原來勞碌的人有樣睇。
右翼美斯（LionelMessi）
橫睇直睇，美斯根本就係張家輝，如果王晶開套《賭俠2010》，播假波條橋唔使再玩朗拿度，今次叫家輝扮美斯，莫講話馬交文，連華仔都俾佢呃到啦！
－曼聯陣營－
領隊費格遜（AlexFerguson）
獲英女皇授勳的費Sir，帶領紅魔鬼東征西討所向披靡，調兵遣將之功力毋庸置疑；獲法政府授勳的杜Sir，縱橫影壇逾20年，多年來與無數演員合作無間，發掘新星更是得心應手。
前鋒泰維斯（CarlosTevez）
「唔知我仲頂唔頂到呢？」田雞在《少林足球》飾演的三師兄鐵打不死，失散細佬泰維斯攻守兼備在球場上一樣拼勁十足，聽聞曼城有意高價收購泰維斯，真係秒秒鐘幾廿萬上落㗎！
右閘拉菲爾達施華（Rafael）
來自巴西的曼聯小將，跑得快、有速度、體能好，加上一副軒仔式的天真稚臉，只要不要像軒仔般恃寵生驕，前途肯定無可限量。
中場傑斯（RyanGiggs）
蘇芬妮寫得出這個，預了被曼聯迷喪插！身為應屆英國足球先生的「傑佬」，曾幾何時以一扭十，滄桑的鬚根散發着陣陣男人味。無奈歲月催人，傑佬竟然跟曾鈺成的髮型及面部輪廓如此的合拍，唉……
前鋒朗尼（WayneRooney）
朗尼成日俾人話似史力加，今次終於似番個人！平日落到場見波就跑，儼如有用不完的精力，荷李活諧星積比力克（JackBlack）同樣精力旺盛過人，不過就用在整古做怪方面。
－明星估波膽－
陳奕迅
波膽：曼聯贏3：2
「今季呢兩隊球隊表現好平均，巴塞攻力好強，曼聯就攻守都好，我捧開曼聯，梗睇好佢哋贏波㗎。」
周潤發
波膽：曼聯贏2：1
「其實兩隊我都鍾意，如果真係只能選一隊，我就偏曼聯啦！如果唔使開工，我都會睇呢場賽事。」
李克勤
波膽：曼聯贏2：1
「兩隊實力好近，曼聯傷兵同停賽球員較少，如果恩尼斯達同亨利唔踢得，就可能曼聯贏2：1啦。」
任達華
波膽：巴塞贏2：1
「巴塞咁辛苦入到決賽，一定會搏盡打，亦唔會俾曼聯得逞。」
梁漢文
波膽：曼聯贏3：2
「今次巴塞中堅馬古斯傷咗，正選左右兩閘都出唔到，防線出現問題，所以曼聯會贏。」
麥玲玲
波膽：曼聯贏2：1
「嗰個時段係金旺日子，利米色、白色球衣，玄學上今場着白色作客球衣的曼聯佔有優勢。」
