每講起《未來戰士》，就諗起骷髏骨架嘅T-800，同大隻佬×撲水州長嘅阿諾。食住新一集上畫，充滿TPS（第三身射擊）元素嘅遊戲版本搶閘推出，由於套戲唔再單拖隻揪而係戰爭味濃郁，所以尊康納都要學成Rambo加《Bio》Chris咁款，舉起火箭炮將班窮兇極惡敵人炸到粉身碎骨。
文：陳福榮
炸爆頑敵超爽快
《未來戰士》遊戲同電影都真係出過唔少代！當中最經典遊戲係《T2Arcade》槍擊Game！今次《未來戰士2018》就以玩法相近嘅TPS作參考，角色動態同遊戲流程都做得唔錯，比起《生化危機5》同《戰爭機器2》完全唔輸蝕。雖然遊戲主角阿尊，同電影版基斯頓造型唔算太似，但故事就回溯番電影版兩年前嘅前傳，解讀佢成為救世主之路，再者亦會間唔中播吓片聯繫番套戲，真係幾有電影感！
揸車瞄機仔樣樣齊
遊戲基本以TPS玩法進行，不過經常有特殊載具出現，例如一方面駕車向前行、另方面又要用車上重型機槍去辣啲飛機同越野車等，幾似《Bio5》坐車嗰版；有時仲要保護埋「校巴」咪俾人射爆，直頭係要一心多用先搞得掂。此外今集電影亦有唔少空中戰機，玩家亦要利用佢哋嚟擊落敵軍空中部隊，但好彩主要係變成空戰遊戲嘅LockOn玩法，唔使太擔心機身控制方面。
掩護隊友聲東擊西
以為成隻Game要阿尊由頭打到尾，咁就大錯特錯，佢學似《Bio5》咁支援「同畫面分割合作」與「網上連線合作」，經常要男女主角共同行動，始終Co-op係時下不能或缺模式；當中最考合作技巧，係對住裝甲相當厚嘅四腳蜘蛛，皆因正面射佢形同[!8AFD]痕，要搵其中一人引開佢注意，再用另一位兜底打背部弱點；類似咁嘅掩護戰法喺遊戲會經常出現。
Profile
機種：XB360、PS3、PC
廠商：EquityGamesProduction/GRIN
類型：ACT
人數：1-2人
價錢：約$320
《未來戰士2018》
10套T-Shirt匙扣等你拎
Game就話搶閘先打！但想喺戲院睇實戲《未來戰士2018》，就要5.28先上畫！今集講人工智能電腦系統「天網」，在發動核爆殲滅人類「審判日」過後的2018年，地球被天網及機械人殲滅者所佔據，苟延殘喘的人類被逐一捕殺，預言之子尊康納（基斯頓比爾飾）現已長大成人，並成為人類領袖，帶領生還者團結起義，打倒機械人。
EdkoFilms今日送出錢買唔到嘅《TERMINATORSALVATION》T-Shirt連鎖匙扣電影精品共10套，只要答中以下問題，連同回郵信封寄往：將軍澳郵箱65264號，信封面請註明「《蘋果日報》未來戰士2018」，便有機會獲獎、先到先得。（如有任何爭議，最終決定權歸EdkoFilms，《蘋果日報》概不負責。）
問題：全版電影、遊戲介紹內共有多少隻T-800？
