豹哥，江湖味極濃的一個酷爆名字，非一般家貓出手快狠準，為護主人新城DJ阿Mi，出爪攻擊我和攝影師。幸好，跟這隻江湖兒女混熟後，牠肯乖乖Sitdown，肯坐定定，全因有最愛零食番茄味百力滋。
記者：蒙為亮
攝影：陳盛臣
豹哥小檔案
品種：花貓（12歲）
性別：男
性格：扮大哥，霸道
嗜好：洗澡、玩水、吃百力滋
豹哥，行年十二尚未娶妻，心口掛着一條刻上「豹」字的紅鏈，氣勢逼人，別以為牠是一般地痞流氓，其實在加拿大出生，不是猛龍不過江，「當年我喺溫哥華讀大一，養開嗰隻沙皮狗啱啱過咗身，原本諗住隔一年半載先再養寵物。」阿Mi說：「有次行入寵物舖，一睇就覺得豹哥好特別，其他貓仔懶洋洋瞓晒覺，佢就不斷撩其他貓仔玩，好似有過度活躍症咁款。下次再探佢，我示意店員開籠，隻隻貓都爭住湧出嚟，吖，佢又好寸喎，今次到佢郁都唔郁，咁型，所以即買，一養就養咗十年，之後我返香港做電台，佢陪我搭飛機返香港。」
最愛洗澡
阿Mi試過替阿豹找一個伴，可惜：「之前買過一隻花貓陪豹哥，不過佢衰霸道，成日扮大哥搶晒花貓啲嘢食，又唔俾花貓黐我，最後惟有送花貓畀家姐養。」這隻江湖貓大哥何以會愛上百力滋呢？「我都唔知喎，話說有次我邊睇電視邊食零食，佢飛撲埋嚟搶我包百力滋，唔使三個字清埋倉。不過佢好揀擇，淨食番茄味，仲要我含過先肯食，加埋牛油仲食得津津有味，最誇張一日食三包，家變肥豹，不復當年勇啦。」
龍頭大哥總有怪癖，豹哥不例外，一般寵物不愛洗澡，牠卻最享受和主人一起洗白白，阿Mi：「佢係清潔之王，最鍾意冲凉，有次佢竟然睥住個沙盤發呆四個鐘，我先知佢不滿我唔換貓沙，真係大哥到無倫，服侍少一陣都唔得。」不過大哥還大哥，一樣有死穴，「一有嘢食佢就會Sit，性格好鬼『狗』吓，以前住加拿大，佢會企喺露台前面監視我入屋，一開門又會勁嗲我，佢都幾可愛㗎。」可愛？我一心抱抱摸摸，尚未出手先中招，豹哥一記閃電爪，即時令我留下血之印記；攝影師為拍攝豹哥英姿，也落得嘴角流血掛彩而回，甚麼是江湖貓，我見識到了。
吞針驚魂
豹哥除蝦蝦霸霸外，更厲害到吞針，阿Mi覆述時猶有餘悸，「阿豹兩歲半嗰年，有日我補衫搞到成地針線，發覺阿豹含住條線望我，起初唔為意，後尾先知原來佢吞針。當時我好亂，睇醫生要成二千蚊加紙，我讀大一做Part-time都係僅僅夠交租，不過諗咗三分鐘，最後都決定帶佢去醫院做手術。手術成功，醫生話遲多五分鐘就玩完，因為支針直插入胃道，嗰次真係驚心動魄，之後我要食足一個月杯麪呀，陰功。」
托賴這幾年，豹哥無病無痛，不過要減肥，「每半年帶佢做Bodycheck，醫生話佢要少食零食，最好冲走百力滋面頭層鹽先畀佢食，食得太鹹對貓仔身體唔好，係唔係呀豹哥？」豹哥擰歪面少理，百力滋還是大口大口繼續吃。
食得寸嘴
阿Mi私相簿
