李超人又趁長實（001）股東會之際發表偉論，對股市睇法，佢一貫提醒散戶要量力而為；但今次除咗呢句以外，仲認為個市繼續上升唔出奇，但又勸大家唔好高追。邊個唔想入市低買高沽，問題係有幾多人做得到。
李超人又強調，熱錢近期流入幾千億元，但以本港上市公司市值約13萬億元計算，三幾千億元唔算大數目，認為熱錢流出香港，亦唔會對本港經濟構成衝擊。呢一句似乎畫龍點睛，事關佢提到要買樓抗通脹，換言之佢認為通脹一定會來，咁股海後市又點會唔升？
不過短線計，港股即使要調整亦冇乜大不了，事關這一浪升幅巨大，整固後再上，個市會健康好多。
中線目標48元
經濟復蘇似成定調，愛股之一東方海外（316）近日表現十分搶鏡。周二股價以大成交升破雙頂阻力，昨再逆市上升3.2%，收報30.35元，走勢一浪高於一浪。由於近日股價累升不小，預料要略作整固，若企穩28元水平，不妨吸納作中線投資，目標48元。
方星俠