煲呔上星期喺立法會扮代表，衰咗後即刻認錯，公民黨俾個機會佢贖罪，日前公開邀請煲呔參加今年六四燭光集會，等佢睇清楚香港人要求平反六四訴求，第日唔好再出醜；何秀蘭則邀請煲呔出席下周三立法會會議，澄清對平反六四立場。
等咗幾日，特首辦噚日分別回覆公民黨同何秀蘭，表示唔會接受邀請，當然，佢答應就係大新聞啦。雖然煲呔已經認錯，但好多人仍然未收貨，有人喺facebook上召集網民，每人科水100蚊集資刊登「曾蔭權從來不代表我們」聲明，據搞手Kelvin稱已經有約100人參加，佢話暫時未有人承諾包底廣告費，但應該會有人願意出大份錢，所以好大機會成事。