花旗股市前晚先升後跌，噚日區內股市嘅走勢都麻麻，港股反覆跌咗276點，報收17199，形勢唔多棧，今日如果跌回250日線樓下，即係話前兩日係假突破，淡友可能會乘勢狂攻一輪。
國際油價轉強，金價又升番，油股同金股都可以留意。汽車股有好消息刺激；睇個勢仲未炒完，可以繼續跟進。
東風C輪16844：東風（489）昨收7.15元，升8.4%，股價收市嘅升幅雖然收窄，但係技術走勢仲好靚，可以諗吓隻C輪16844，博正股炒上9元。
隻輪現價36.5仙，2010年9月29日到期，行使價5元，溢價20.9%，引伸波幅90.5%，槓桿率1.9倍（有效1.5倍），正股升上9元，16844睇52仙，正股跌穿6.30元，就沽咗隻輪止蝕。
俊樺