無綫前日公佈裁員第三波行動，雖然一直以來無綫有盈利，不過老闆計過條數，慳得一蚊得一蚊，既然員工可以cut，大騷一樣照cut。
馮仁昭八到首當其衝嘅係台慶月歌星晒冷騷《翡翠歌星賀台慶》，今年決定停辦，而《萬千星輝頒獎禮》會延遲到12月初先做，唯一冇變嘅係全台總動員嘅大騷《萬千星輝賀台慶》繼續喺11月19日舉行。
延期搞頒獎禮
無綫外事部副總監曾醒明話：「以前《翡翠歌星賀台慶》都有幾年停咗冇做，今年台慶節目有少少改形式，《萬千星輝賀台慶》照喺19日舉行，不過《萬千星輝頒獎禮》會喺12月初舉行，因為過往兩線台慶劇，都冇份入圍候選，咁覺得對台慶劇嘅台前幕後人員唔公平，所以今年頒獎禮會喺12月初做。」今年無綫兩線台慶劇有《宮心計》、《富貴門》，全部都係大卡士，加埋近期大熱嘅《巾幗梟雄》真係有排鬥。
體育組重災區
無綫製作總監（非戲劇製作）何麗全話：「今年係取消咗《翡翠歌星賀台慶》，其他大騷冇減少到，只係減咗呢個啫，之前裁員係有啲影響人手。」
另外，無綫前日裁員行動中，有多個部門受影響，其中體育組大傷元氣，部門20幾人裁咗接近一半，何麗全話有啲體育組同事調咗過綜藝組幫手，因為有啲球賽賽事減少播，咪唔使咁多人手。
製作主任（綜藝及體育製作）李漢源就話裁咗幾個，不過有啲又調組去咗綜藝組，唔可以講係重災區嘅，咁少咗人手點都有啲影響工作。