憑《童話》一曲在港打響名堂的馬來西亞歌手光良，為進一步入侵香港樂壇，現正籌備新專輯，他更特別首次收錄兩首廣東歌曲，進一步做「香港仔」。為免在表演唱現場出洋相，光良密密練歌。
唱情歌起家的光良，為讓歌迷有新鮮感，現正籌備新國語專輯，首次收錄兩首廣東歌《店小二》和《清水》，他早前來港錄這兩首歌曲，接受本報訪問時說：「係咪做到真正嘅香港仔都唔知，要歌迷去判斷，一切順其自然。我唔知做一個道地嘅人好唔好，不過為咗迎合香港歌迷口味，呢兩首歌都唔係由我去創作，特登喺香港收歌。」
尋找簡單愛情
雖然沒有參與創作，但歌曲不難找到光良的風格，由歌名到歌曲內容，都充滿光良的簡約愛情風格，他說：「《店小二》其實係話自己做一間舖頭嘅老闆，希望有日搵到合適嘅老闆娘。經營一間舖頭，同經營一段愛情一樣，唔係咁容易，相信聽眾都會覺得我嘅歌，會好似『清水』咁簡單。」
老師讚冇懶音
要更深入一個社區，少不免做很多籌備工作。懂說廣東話的光良，錄歌前找老師補習，但光良還擔心現場演繹，他說：「老師話我冇懶音，但係我經常以普通話思維去唱廣東話，所以會有變音。好似唱『都市』，我會唱咗『都是』，唔跟住個音個意思就會錯，所以歌詞我做咗好多記號同筆記。」
採訪：王連連 攝影：仇志德
髮型：SunnyYuofHairCulture
化妝：江中平ofA&VMakeupSchool
服裝提供：Izzue