正所謂浪子回頭金不換，F1巴恩車隊嘅英國車手畢頓，一改以往花花公子嘅形象，成績突飛猛進，今季頭5個分站贏足4個。今個周末F1舉行摩納哥站，睇吓「齋戒沐浴」咗差唔多兩星期嘅畢頓，贏唔贏到第5個分站冠軍？
正備戰周末摩納哥站
畢頓同車隊周三抵達摩納哥備戰，接受傳媒訪問時，呢位以往出名風流嘅車手就好正經咁講：「自從贏咗西班牙站（5月10日），我腦海就只得賽車，不斷諗下一站點鬥；講真，呢幾個星期都幾大壓力，我之前從未有過咁好成績，我都想暫時忘記賽車住，但都唔成功；家我係一個悶蛋（boringbastard），女朋友如果發現，都可能咁同我講。」
畢頓坦言呢兩個星期都冇去蒲，咁乖仔當然同之前賽車生涯唔順有關。畢頓00年加入F1，直至上季都係贏過一次分站冠軍咁大把，效力嘅本田車隊仲摺埋；相反同胞咸姆頓第2季參加F1，上季就贏總冠軍。好彩畢頓成功由本田過渡到巴恩，成績仲大躍進，繼澳洲站、大馬站、巴林站，更贏埋西班牙站，累積41分，喺車手榜遙遙領先。
畢頓話：「當你領先，取得亞軍都係失望。」但周四首次練習賽，畢頓只得第8，相反隊友巴里哲奴就第1，畢頓都要提起精神先好。
日籍女友親臨打氣
不過，畢頓嘅日籍女友道端積西嘉（JessicaMichibata）亦會親臨摩納哥，為男友打氣。呢位日本模特兒樣靚身材正，睇怕畢頓要練埋「忍功」，修心養性埋呢幾日；如果畀女友搞到「破戒」就唔好啦！事關摩納哥蒙地卡羅賽道出名多彎難度高，贏唔到都唔緊要，大吉利是有咩意外……當我求大俠冇講過啦！