牛年新正頭車公籤文批示香港今年冇運行，果然好嘅唔靈醜嘅靈，不出幾個月，金融海嘯風高浪急，豬瘟又殺到埋身，香港人都算唔好彩，但正所謂否極泰來，香港勝在有祈福黨，為咗幫香港轉運，幾個高官月底會帶頭為政府祈禱，希望香港雨過天晴，大步檻過。
三男禱告幫香港求神
今個月31號係全球禱告日，由前高官馬時亨太太王培琪牽頭嘅「全城更新」組織，會喺大球場舉行萬人祈禱會，「馬太福音」號召力強勁，可以召集高官祈福黨出嚟辦大事，幾個虔誠信徒高官包括律政司司長黃仁龍、政制及內地事務局局長林瑞麟、保安局局長李少光則負責為政府禱告，求神幫助香港走出生天。
特區政府瓣瓣唔掂，代禱事項怕且一疋布咁長，迫在眉睫嘅相信係為整個管治班子祈福，希望神明打救高官民望唔好長期潛水，至於豬流感疫症、金融海嘯經濟問題，高官都冇晒符，可以真係要求神伸出援手先有救，其他事情都十分棘手，幾個高官與民共度時艱減薪事在必行，大家唔好以為局長幾十萬月薪，唔志在減人工，但佢哋都係打工仔，同大家一樣打份工啫，前高官葉劉就自爆當年減薪一成感到好肉赤，可以想像高官有機會都應該會祈求唔使減人工。
另一樣高官心掛掛嘅，自然係7.1遊行人數，今年係六四20周年，經濟又不景，失業率居高不下，通通都係催谷市民上街嘅火藥引，民怨大爆發，政治後果難料，阿爺心情唔好，又有人要腳痛，恐怕祈禱都冇乜用，如果畀八方揀，寧願求神唔好再畀煲呔講錯嘢好過，事關佢把口唔收嘅話，分分鐘又亂噏廿四，曲線為7.1遊行call人上街，屆時真係冇眼睇。
再有狂徒喺旺角掟鏹水彈，警方似乎束手無策，若然月底前仍然未能緝拿兇徒，八方建議李少光順便為市民祈禱，唔好咁唔好彩俾腐蝕性液體淋到，至於林D9，佢都自認係「人肉MP3」機，其實當日是否到場祈禱都冇乜所謂，好似平時同議員開會咁，錄定音現場播放就得，仲可以由朝到晚反覆播放，夠晒神心。
mailto:[email protected]