相由心生，講人，亦可以講車。一個人心地好，人都靚啲；一架車本性善良，個樣一樣靚仔啲。好似以Hybrid混能打響名堂嘅Prius，性格節儉識得幫主人慳油，脾氣一流唔會亂放廢氣，仲識醒目乖巧地食少少出大大力擔擔抬抬。全新第三代Prius250，無論性能、配備、外形定係環保程度都全面提升，從外到內，越嚟越靚。
記者：許維雅
攝影：周旭文
Model：CC
容量提升耗油減
環保課題日益受重視，連香港都話要盡快引入電能車，但試問成日都驚手提電話無電嘅香港人，又點會肯咁快接受電能車呢。作為環保先驅嘅Hybrid混能車可以話係最好嘅平衡點。被譽為全球銷量最高、08年已經突破100萬架嘅Prius混能車，當然係豐田車行嘅未來重點之一。闊別六年再推第三代出籠又點會失禮呢？Prius250無論耗油同廢氣排放量都更勝一籌，雖然將引擎由1.5公升提升至1.8公升，但卻可以利用多方面嘅技術配合，比起上一代慳多10%嘅燃油，油耗量為25.25km/L。喺燃油同電動引擎互相配合運作之下，汽車停頓或者每小時均速50公里之下，都只用電動馬達，用油行車時又自動會識叉番電，加埋廢氣再循環系統，可以話係物盡其用。
落重料升格
有時內在美同外在美的確好難並存，好似唔少人都曾經埋怨Hybrid混能車嘅外形唔夠吸引，但Prius250就話你知：「我都可以高格調，我都可以好靚仔。」除咗全新設計嘅流線型車身外，內櫳嘅升級裝備真係唔到你唔服。智能車匙、投射顯影屏幕、觸控追蹤顯示、藍芽免提、外置音源輸入及四幅式真皮軚環連輕觸式軚盤按鈕等，都一一將呢架揭背車仔升格，嗰份感覺高檔嘅虛榮都係物超所值嘅地方。不過有齊以上內外美元素，都可能只可滿足一眾女士，最令男士憂心始終係馬力夠唔夠嘅問題。根據官方資料，呢副1.8公升引擎同電動馬達合作之下，力量可媲美2.5公升房車，實試過嘅我可以肯定，架車的確幾好力，輕踏油門已經感覺好暢順，加埋個PowerMode制式作上斜嘅後備，力量絕對唔係問題。
Prius250規格
引擎：1,798cc直四VVT-i
馬力：99ps/5,200rpm
扭力：142Nm/4,000rpm
電動馬達：馬力81.5ps/扭力546Nm
傳動：電子控制無段變速、前驅
預售價：$249,315（原價：$265,000）
查詢：皇冠車行（28661020）