活在一夫四妻的大家族中，妻妾爭鬥本是等閒，勾心鬥角中有勝有負，《巾幗梟雄》中商天娥飾演的二奶奶則是四房中最蠢一位，本像古代版洪興十三妹態度面對家事，被煽動而與四奶奶（鄧萃雯飾）為敵，最終輸掉男人及親情，現實中的娥姐，卻想一嘗做大當家的滋味。撰文：卓寶花
商天娥在劇集《巾幗梟雄》中飾演二奶奶彭嬌，最初事無大小大吵大嚷，原以為是惡毒女人，劇情一直發展下去方知二奶奶是醜人角色，先後被利用，因為兄長是黑幫頭目彭鏗（李成昌飾），慶豐年老闆蔣喬（岳華飾）常利用二奶奶與兄長關係經商，另一方面她又受大奶奶（謝雪心飾）煽動，與四奶奶爭鬥，其後方知背上「治鬼靈符」稱號，周一晚（18日）與蔣喬攤牌後聲淚俱下出走，幕幕內心戲吸引最高37點收視（約235萬觀眾），對於收視報捷，娥姐表示滿意，可以冲喜。
憾未能與柴九鬥戲
二奶奶面對一段似是而非的愛情，心中早有預算，娥姐說：「只有我愛佢（蔣喬），冇佢愛我，係搵我嚟鎮住我阿哥（彭鏗），方便疏通生意，所以我名正言順係古代版洪興十三妹，後來心灰意冷咪出走。其實我喺戲中係最冇機心㗎，只係被大奶奶煽動。」娥姐透露與岳華演感情戲時內心掙扎，她說：「因為拍《義不容情》時佢係做我老竇，今次好彩係古裝啫，唔係好難做兩公婆，真係要靠想像力去投入愛呢個男人。」
在戲中二奶奶戲份與幾房惡鬥居多，相反與柴九（黎耀祥飾）無緣較勁，如今劇力十足，娥姐說：「同祥仔電影上合作過，但電視上未試過，初時傾劇本以為都有機會碰頭，可以拗手瓜擦出火花，因為行內人盛傳祥仔記台詞好好記性，好想同佢碰吓，尤其感情戲，但可惜劇情交代我死咗都冇機會。」娥姐又不介意演奸角，認為奸角永遠在觀眾腦中留下印象。
娥姐認為《巾》劇美中不足是女人鬥爭戲可以再添加，會令大家發揮更淋漓盡致，有傳雯女與娥姐不和，戲裏戲外均鬥個你死我活，娥姐否認此說，直指二人關係是好朋友。
留無綫錯失逾百萬
娥姐演技有實力，但《巾》劇的重頭戲落在四奶奶身上，問她可想一嘗大當家滋味，娥姐說：「我接拍《師奶股神》時就有一套內地劇搵我，正正係飾演大當家，仲有七位數字，但撞咗期，冇辦法，我都要搵吓新火花。」娥姐加入電視圈26年，拍過不少作品，她表示今次未算最大發揮，但要數最深刻演出則是前年的《師奶股神》及早年的《笑看風雲》，記憶猶新是在《笑》劇中擔演律師，兩頁紙對白，很有發揮。近來娥姐則愛上演輕鬆喜劇，她說：「呢個係我大考驗，做喜劇會開心啲，觀眾又睇得開心，個人都活力啲。」攝影：陳慧安
今晚劇情
第19集：必文通緝四奶奶
四奶奶寶琦（鄧萃雯飾）把蔣家家產整理妥當，然後鎖於賬房，後把賬房鎖匙交給必文（敖嘉年飾），早上必文發現家產及重要文件全不翼而飛。原來寶琦竟與必正（吳卓羲飾）及其他人躲在教堂地庫。必文召集米行工人，更向他說將重開米行，也展示官府通緝寶琦之告示（圖）。傳教士突然向四奶奶說出有人欲見她，原來竟是柴九（黎耀祥飾）。必文宣佈將辭退與四奶奶關係良好的工人時，王爺（郭峰飾）突然到臨蔣家，指受蔣喬（岳華飾）所託在他身故後宣讀遺囑，此時四奶奶也帶着家產與眾人出現，必文因事被帶回官府審問，鳳儀（謝雪心飾）為請四奶奶救助必文，不惜向她下跪。因得悉王爺因軍情告急離開無錫，鳳儀賄賂林知府，終順利令必文獲釋。
小八卦：柴九金句熱爆網
黎耀祥飾演的柴九讀書不多，但金句成籮，網民狂熱收集，氣勢直逼《學警狙擊》的Laughing哥，最出位一句當然係「人生有幾多個機會？人生有幾多個十年！」其他經典金句如下：
「水裏水裏去，火裏火裏去。」
「最緊要痛快！」
「我已經係四奶奶嘅人，你要我行，我就行。」
「除咗四奶奶，全部都係豬玀。」
「你話過要拚咗條命保護我，我今日就拚咗條命同你講句公道說話。」
「我呢啲喺死屍堆度爬出嚟嘅，有咩唔得呀？」
