無綫推出的新一輯《謎》，除繼續有「Adam鄭」鄭少秋和「謎女郎」呂慧儀撐場外，還找來扮嘢功夫同樣了得的「謎女王」羅蘭助陣。呂慧儀和羅蘭姐雖同樣因這個新配搭大感過癮，但前者要讀報紙苦練中文發音，而頗多英語對白的羅蘭，則要找教友惡補英文。
因為鄭少秋近日正在內地拍劇，所以宣傳新一輯《謎》的工作便落在羅蘭和呂慧儀身上，二人日前接受訪問，大談首度合作的感覺。
讀報練中文
羅蘭說：「今次我哋合作得好開心，我同秋官喺71年曾經合作過《歡樂今宵》，之後一直都無緣喺電視劇度合作，所以我都冇諗過今次竟然會一齊做主持。唔使埋位嘅時候，我哋都會講吓當年一齊做《歡樂今宵》啲趣事。」
謎女郎呂慧儀則說：「今次真係好好玩，喺節目度有好多嘢要講，例如有好多學術性嘅對白，又會有好多地方名同人名，雖然我自問中文會話嘅成績都唔錯，不過監製事前同我講，要讀多啲報紙，對發音會有幫助。」
呂慧儀續說：「新一輯《謎》我又有好多機會同秋官一齊扮嘢，秋官扮乜嘢似乜嘢，真係好有型又靚仔，初初我都有啲怯場，不過秋官同羅蘭姐叫我放膽試，喺佢哋身上真係學到好多嘢，仲發掘埋我嘅喜劇細胞㖭。」
半桶水英語
其實不單止呂慧儀要接受考驗，連羅蘭姐也笑言被考起，她說：「今次我係扮英女皇，有好多英文對白，我家啲記性麻麻，而且又唔係好識英文，好彩有教友幫手，監製仲叫我誇張啲去做，所以咪有呢個莊嚴又搞笑嘅英女皇。」
採訪：何慧斯
攝影：陳俊強
服裝提供：SoulImpressionatLCX（呂慧儀）
