去年業績大倒退兼大減派息嘅中銀香港（2388），今日舉行股東周年大會（AGM），場地移師到同中環中銀大廈相距足足兩個地鐵站嘅灣仔會展，最詭異嘅係，每年中銀開完AGM都會見一見傳媒，今次傳媒「被迫」與小股東分開，乖乖留守中銀大廈等見管理層，名副其實將記者與小股東實體分隔。
與記者會分隔兩地
中銀香港發言人就話，今年將記者同埋小股東分開喺唔同場地，因為訂唔到會展大場喎！華華勢估唔到，金融海嘯之下，展覽兼會議場地會係咁爆場喎！睇番港交所（388）資料，中銀舊年股東會仍然喺中銀總部，前年就曾經喺會展舉行。
話說回來，中銀家就同證監會傾緊點樣解決雷曼迷債事件，過往大半年，苦主接二連三衝擊中銀大樓，喺總部示威，唔知係咪擔心股東會入面有人渾水摸魚，所以今年特登搬竇呢？