《巾幗梟雄》蔣家幼子，武仔，蔣必武，一個似曾相識的新演員梁証嘉，曾經參演青春劇《尖子攻略》，五官端正，斯文有禮，酷似陳浩民的外形，令他在藝員訓練班開始，已經有不少演出機會。今次有機會跟心目中的好戲之人黎耀祥合作，梁証嘉直言十分開心，為了觀摩祥仔精湛的演技，還不時悄悄留在錄影廠內偷師，他驚嘆地說：「真係好犀利，佢唔係為咗講對白而講對白！」
撰文：楊潔雯
監製李添勝喜歡提拔新人，今次《巾幗梟雄》便起用了藝員訓練班畢業的新人梁証嘉，大家或許會以為他由頭到尾只是一個行行企企的無謂人，不過蔣必武在今晚的第18集會有一場送母親骨灰返家的重頭戲，足以令他嶄露頭角，連蔣老爺岳華都點名讚揚武仔做得好。
感謝馬浚偉教路
梁証嘉說：「嗰場戲我都好緊張，之前一晚食飯都食唔落，我最重飛係呢一場，我都有問其他前輩點算。我記得自己第一次睇呢場戲個劇本係睇到喊，覺得我娘親（商天娥飾）真係好慘，我就係記住第一次睇劇本嘅心情，當時個感覺演出嚟，就好似講緊個故事畀人聽咁。」
演戲經驗淺不是罪，貴在要懂得虛心求教，梁証嘉表示要特別鳴謝馬浚偉，他說：「小紅姐（惠英紅）見我食唔落飯，佢見到馬仔（馬浚偉）就叫佢畀意見我，佢睇完個劇本，都話對我嚟講係有難度，之後佢就喺我個劇本上面好似寫攻略本咁，喺一啲特別嘅地方加上符號同文字，例如邊個字要大聲啲，邊個位對眼可以outfocus，之後佢仲話會入廠睇我點做，事後我知道佢真係有嚟睇我做嗰場戲，佢都話收貨，仲話估唔到我可以咁放。」
戲裏戲外，武仔同樣得到家人愛護，他說：「武仔性格同我差唔多，蔣家所有人都好錫佢，拍劇時好多前輩都係好錫我，三媽（惠英紅飾）同四媽（鄧萃雯飾）成日提我，我阿媽（商天娥飾）就大情大性，佢會話：『咁做係咪好啲呀！』幾個阿媽感覺唔同。」
讚嘆老戲骨功力
有幸跟一班資深演員合作，梁証嘉自言得益非淺，更擴闊了他對演戲的眼界，深深感受到演員之間的張力，他說：「阿爹（岳華飾）同三媽、四媽真係畀好多推動力我，我記得娘親死同阿爹死嗰兩場戲，我都好深刻。娘親死之後，我捧住佢啲骨灰返屋企，阿爹望住我，雖然佢冇對白，但係佢眼神同動作已經講咗，叫我唔好咁傷心，仲有阿爹喺度，我feel到佢有嘢畀我，佢嗰種力度，我感覺到我好似佢親生仔，嗰一刻我喊得仲犀利。」
梁証嘉續說：「之後拍阿爹死嗰場，大媽阻住四媽聽阿爹遺言，之後仲假傳阿爹臨終遺言，當時真係好憎大媽，我覺得佢好過份，平時唔出聲嘅我都忍唔住鬧大媽講大話，我當時嘅情緒都係俾大家帶動出嚟，佢哋真係好犀利！好多嘢我以前唔知，有時現場見到好多演員做戲好誇張，之後就知道係有需要，好似鏗爺（李成昌飾）咁，見佢好誇張，其實咁樣係突出性格，娘親都有同我講，現場誇張，但係拍出嚟喺螢光幕睇嘅力度會減弱，我家終於明白啦。」
攝影：陳順禎
今晚劇情：
第18集三奶奶遇難蔣喬病逝
必文（敖嘉年飾）不滿卿嫂（馬海倫飾）指他謀害柴九（黎耀祥飾），在眾人面前大吵大鬧，四奶奶康寶琦（鄧萃雯飾）出現替必文說好話。沙寨主發現柴九大難不死，決定接他回山寨治療。
四奶奶為讓時日無多的蔣喬（岳華飾）安心，希望必正（吳卓羲飾）與丘敏（徐淑敏飾）提早舉行婚禮。必武（梁証嘉飾）被蔣喬聘請的鏢師從杭州救回無錫，蔣喬與彭鏗（李成昌飾）看到必武帶回來的骨灰罈，大受打擊，彭鏗指摘妹夫蔣喬害死其妹。
蔣喬一病不起彌留之際，大婆鳳儀（謝雪心飾）使計令四奶奶與必正無法及時趕回蔣家，又靠彭鏗與林知府撐腰，要四奶奶將蔣家權力交給必文。
鄧萃雯號召米宴賞結局
黎耀祥、鄧萃雯、謝雪心和徐淑敏等一班《巾幗梟雄》演員，前晚在尖沙嘴東海酒家舉行慶功宴，幾位主要演員自掏腰包夾錢5位數字筵開5席。
《巾》劇叫好叫座，本周一最高收視更達37點（即約有235萬人收看），黎耀祥坦言盼公司大結局時安排在大型商場播映，讓演員與觀眾齊齊收看，雯女也說：「都有同陳志雲反映，真係有需要，咁多觀眾支持，口碑又好，最好搞埋米宴，到時可以做埋善事，呢個係四奶奶嘅心願。」又謂希望收視衝破4字頭。
此外，李添勝監製的《巾》劇收視理想，無綫決定《老婆大人》播畢後，於6月8日推出由李添勝監製的《碧血鹽梟》（前名《勝雪鹽棧》），原定播出由梁材遠監製的時裝劇《老友狗狗》則被抽起讓路。
採訪、攝影：卓寶花
