煲呔連同佢個管治班子要減薪與民共度時艱，相信無可避免，官府放風話大約減五個巴仙，對一般打工仔而言，呢個數字好可觀，但對於尸位素餐官員，就真係太少嘞，老董年代做局長，曾受減薪之苦嘅葉劉噚日開價，指問責官員最少要減薪一成先至算有誠意。
葉劉噚日話，當年老董帶頭減人工，問責官員冇得選擇乖乖奉陪，佢自爆其實私下覺得幾肉赤，事關佢做局長要經常見記者，受輿論同市民批評，搵嘅係辛苦錢，計落份人工都唔係好高，仲要減薪真係好唔抵。佢又指當年董生願意減薪一成，煲呔冇理由少得過呢個數目啫，雖則話董生身家厚唔志在，但煲呔係為人民服務政治家，應該更加大公無私囉！