創刊50年嘅《明報》，慶祝金禧報慶，噚晚喺金鐘萬豪酒店舉行酒會，咁高興嘅日子，真係可喜可賀，可惜豬流感肆虐，瘟疫陰影籠罩揮之不去，《明報》學似政府咁實行非常措施，自行將酒會提升至緊急戒備狀態，更採取「維景式」隔離措施，將所有賓客隔離喺酒會入面，而所有非《明報》嘅記者就好似感染咗甲型H1N1病毒咁，慘遭拒諸門外，只能夠企在場外記者區做企鵝。
發請柬但限制採訪
有半世紀歷史嘅《明報》金漆招牌，江湖地位十足，所以噚晚報慶酒會真正係冠蓋雲集、衣香鬢影兼夾星光熠熠，財爺鬍鬚曾、金管局任總、司長唐英年、黃仁龍，局長陳家強先後現身，連同其他高官，幾乎大半個政府高層總動員，「第二支管治隊伍」中聯辦都有派官員出席。明星、名人更加數之不盡，小齊、阿Kay、Laughing哥、譚校長、樂基兒、張家輝、麥玲玲、詹瑞文等等應有盡有，亞視張永霖、商台俞琤、有線小明哥都有捧場，當然唔少得主禮嘉賓特區首長煲呔，佢代表香港人到賀，唔該晒。
《明報》金禧報慶忽然落閘玩自閉，唔知算唔算新聞封鎖，《明報》都係傳媒機構吖，報慶酒會卻謝絕採訪，八方真係唔係幾明，係唔係喺豬流感危機之中，舉行一個「維景式」酒會先至夠應景？定係因為唔想得失到場政要權貴，恐防記者打擾佢哋雅興，影響恭賀《明報》心情，所以要阻止幾十個記者採訪呢？
八方知道在場記者對限制採訪十分有意見，《明報》搵公關經理劉小姐出嚟解畫，劉小姐強調報慶酒會係「私人宴會」，之前發出請柬予各傳媒機構，純粹係請大家出席畀面派對，對於有眾多記者到場採訪，佢話「我都唔知點解」，可能係大家對請柬嘅定義理解唔同。
至於點解要在場外劃出記者區，困住記者唔畀隨處走，劉小姐話其實呢個係一場誤會，個「記者區」其實唔係畀記者企入去，只係用嚟維持秩序㗎咋！好多行家抱贈興心情而來，卻谷住成肚氣掃興而走，冇癮到爆。
mailto:[email protected]