泛民日前北上考察大開眼界，對旅途見聞回味至今，白鴿黨高達噚日再爆一單笑料。話說考察團同廣東省副省長萬慶良會面，高幹吹水唔抹嘴，唔使稿閒閒哋可以solo大半個鐘頭，泛民聽唔慣，人人昏昏欲睡，高達狂香口膠提神無效，矮仔多計，借尿遁入廁所唞唞氣。
磨足10分鐘死氣蒲頭
由於唔想咁快出返去接受催眠，高達解決生理需要後，洗完手又洗面，足足磨咗10分鐘，點知忽然有人喺門外用普通話問佢：「你還在嗎？」高達心知大限到，死死地氣蒲頭。佢話其實內地十分留意幾個「無證」議員舉動，幾日行程幾乎亦步亦趨，估唔到連去廁所都到實，可能驚佢哋爬窗走人搞搞震。
咪以為泛民先有此待遇，貴為人大代表都未必可以喺內地自由行，港區人大代表團8月去江西視察煤礦，葉國謙要求入地底煤礦考察，亦有人想自駕遊，不過江西省政府同人大秘書處都以安全為由拒絕。煤礦安全係敏感問題，貿然俾人大深入險境，萬一有命出來，向上頭打小報告怎麼辦？呢個要求，梗係托手踭啦。