古代中國女人，美德係要「三從四德」，今日全新HondaOdyssey一樣咁有美德，不過就係「三重四得」。「重」，重要個「重」，第四代Odyssey、重長、重幼、重友；講到「得」，咪就係慳得、砌得、威得同改得囉。等我哋一齊解構吓呢種咁多層次嘅美德啦！
記者：梁美甜
攝影：陳陶鈞
Model：Ayu
三重人人寵
全新四代Odyssey，最突出嘅性格，係對上得你車嘅一眾親朋好友尤為重視。較上一代略為收身，車身增長30mm及降低5mm，長度增加內櫳自然大咗，增加嘅空間則全數受惠於後排，於是你嘅男女老幼乘客，都坐得更舒服。而低地台又方便咗老人家同小朋友上落，出入後排更可以「不求人」，因為中排椅背下設有腳踏，後排乘客一踩腳踏便可以輕易推動中排座椅，只靠自己都一樣落到車。
四得實用慳家
話全新四代Odyssey慳得砌得威得改得一點也不誇張，車身採用全新調校過嘅2.4公升i-VTEC引擎，導入智能轉向控制系統，遇濕滑路面或高速失控時自動介入以穩定車身，令行車更穩定，操控更易。降低車身令重心更低，入彎更穩定。高性能更係成為車迷改裝熱選嘅原因之一，當然亦都好砌得，新車新偈亦較以往節省5%油耗量！
新車外觀亦有所修飾，新式頭唇鬼面罩及頭燈組令車頭更惡更有精神，尾燈組設計亦作了細微改動，加上香港獨有鍍邊尾門設計，扮足型仔長陣房跑。外形唔老套又夠台型，載住成班朋友一齊出動去蒲去威一啲都唔失禮，誇啲用佢搬屋載貨，收起後排可騰出708公升載貨容積，實用到你唔信。懶型又或者係可以偷懶都好，電動後排真係幫唔少忙，一隻手指篤個掣，即可完全收納或者還原後排座椅，唔使係大隻男都可以操控自如。樣樣得，仲唔係犀利過古代德行美人？
規格
引擎：2,354cc直四i-VTEC
馬力：180hp/6,500rpm
扭力：22.2kgm/4,500rpm
傳動：五前速自動波
售價：待定
查詢：合群汽車（28278622）