唔經唔覺，最近接連成功打大老虎嘅證監會，已經成立了20年，聽日嘅二十大壽慶祝晚會，仲搵咗新鮮滾熱辣嘅諾貝爾獎經濟學獎得主克魯明（PaulKrugman）大駕光臨，分析全球金融海嘯幾時結束，換句話講，即係預示股市幾時先開車飆上，華華相信會場到時都會逼爆。
大師上星期先喺北京、上海同廣州等地，同內地頂級經濟學家巡迴「論勢」，但幾乎次次都反客為主，除咗指摘中國操縱人民幣滙率導致巨額貿易順差，亦預言全球經濟V形反彈相當渺茫，始終衰退現象相當嚴重，唔知今次來港又會擦出乜嘢新火花？
內地演講費要130萬
不過，佢詞鋒咁銳利嘅演講，廣州《羊城日報》引述消息人士話，每場至少收130萬元人民幣，喺咪真確，無人證實。但邀得當紅炸子雞演講，等於喺全球免費落廣告，都算提升香港金融中心地位嘅！