港男港女瘦身難，高官減薪更難。政府做完調查後發現，呢兩年好多打工仔飽受減薪之苦，所以公務員都應該要跟大圍一齊減薪，官方講法即係共度時艱。當局未正式公佈公務員減薪幅度，不過上自特首煲呔、一眾司、局長，下至副局長、政治助理都話願意減薪，減幾多人工未宣佈。
煲呔聞減薪即嘆氣
打工仔冇人想減人工，煲呔都唔例外，噚日朝早開完行政會議離開政府總部時，被記者追問減人工問題，佢面有憂色，情不自禁講咗句：「唉！減薪！」煲呔嘆氣後先至講話願意與市民共度時艱，不問而知佢有幾咁愁。
煲呔迫於無奈自減人工，確係為勢所迫，唔係經濟問題而係政治壓力，上星期佢就六四事件講錯嘢，市民已經把幾火，如果唔肯減薪，恐怕刺激更多人六四出嚟、7.1上街，用錢可以解決嘅問題就唔係問題，如果減幾個巴仙人工可以令社會更和諧，咪當破財擋災囉！
根據政府調查，高官最少要減半成人工，特首、司局長減薪幅度，睇怕百分之五係最低消費，八方認為佢哋應該減多啲，商務及經濟發展局局長劉吳惠蘭曾建議打工仔減人工一半保住份工，或者一份工兩個人做，人工就對分，變相創造多一倍職位，失業率即時回落，但原來呢個「五折支薪」建議不適用於高官，劉吳局長口爽荷包，噚日記者問佢是否願意減一半人工，佢冇回應，只係話願意同市民共度時艱。
劉吳局長身為問責官員，有言在先，更應該帶頭減薪，否則講一套做一套，闊佬人哋孤寒自己，市民條氣點順呀，如果高官唔捨得減一半人工，可唔可以講價呢？譬如話薪酬水平同民望掛鈎，如果民望達合格或以上水平，就可以全數支薪，否則就按比例減人工，至於自言係「人肉MP3」嘅政制及內地事務局局長林D9，公認係冗員，早就應該唔出糧畀佢。
而用卡片做入息證明嘅阿蘇副局長，為免佢要印新卡片，八方覺得可以考慮豁免佢唔使減薪，不過八方請老闆記住，煲呔自願減薪係佢個人意願，曾蔭權不代表我。
mailto:[email protected]