克魯明到中國北京、上海、廣州出席經濟論壇，演講三場，原來每場收演講費十九萬美元，三場就有五十七萬美元，四百幾萬港紙，好過執。不過人哋大名鼎鼎，普林斯頓教授噃，攞埋諾貝爾獎㖭，兼且係《紐約時報》專欄作家，曝光率高，先至可以收咁嘅價錢。克魯明唔知在普林斯頓有幾多薪水，以佢嘅名氣，應該至少有五十萬美元啩？JeffreySachs由哈佛轉到哥倫比亞，好似就係呢個價錢。美國大學教授唔係收十二個月人工嘅，暑假冇糧出，唔似得香港啲大學咁慷慨，所以一般文科教授不算收入豐裕，但經濟、金融、商科、法律教授有咗名氣之後，收入就高得驚人，加埋演講費就更加冇得估計。
香港就唔多興畀演講費嘅，如果啲學者以普通話為母語，到內地或台灣演講當然可以增加好多收入，譬如中大財務學講座教授郎咸平在大陸演講一場，收費十二萬人民幣，相形之下，佢份中大薪水，濕碎啲噃，有志者不妨拚命學好普通話先。最近逝世之台灣著名文人高信疆十幾年前同左丁山講，佢在台灣一年嘅演講收入與出場費（例如到電視台做節目嘉賓），超過一千萬台幣，所以佢好奇怪香港有人搵佢，居然同佢講心不講金！左丁山唔知點答。
呢日碰到經濟學大教授Ｒ，佢唔喜歡克魯明之學說，話佢太重意識型態，經濟邏輯有時講得好勉強。冇法啦，當今左派學說當道，芝加哥學派退避三舍，克魯明與Stiglitz最為當紅。佢哋一套干預政策得唔得呢？尚係未知數，但政府救市之後遺症已初步顯現。收過美政府TARP銀紙嘅富國銀行（WellsFargo）專注做美國國內嘅貸款，一個客仔係美國著名成衣製造商HartSchaffnerMarx（簡稱Hartmarx，奧巴馬宣誓就職時所穿之禮服，就係呢間公司產品）面臨財困，貸款銀行就係富國。富國話呢間公司完全無力還債，一月二十三日已申請破產保護，欠富國一億一千四百萬美元。現在Hartmax工人示威有眾議員撐腰，抗議富國無良，攞咗政府TARP錢，又唔繼續借錢嚟救援美國百年老店（Hartmax有一百二十二年歷史），哦，富國尚未國有化，已經綁手綁腳，睇住壞賬無法收回，以後撥備必然大增。做呢啲銀行股東，制唔過，留番畀畢菲特啦。