吳浩康嘅模特兒女友莊思敏，行騷當然易過食生菜，佢噚日應邀到灣仔藝術中心，不過就唔係行騷，而係擔任內衣設計大賽嘅評判。
莊思敏行過泳衣騷，但佢話絕對唔會透視露點上陣，唔知係咪怕男友唔鍾意呢？見現場啲參賽內衣設計相當出位，其中除咗有SMfeel外，有啲模特兒又露出patpat，相當香艷，有啲設計就玩cyber同紳士feel，家啲設計師果然諗頭多多。
近日莊思敏簽咗盛傳係謝霆鋒做老闆嘅經理人公司，同謝婷婷做同門師姐妹，同公司嘅仲有周秀娜，競爭都幾大喎，莊思敏對此話：「我唔知霆鋒係咪老闆，但同婷婷喺工作上都見過幾次，有打招呼，但私下就冇聯絡，公司多人多競爭係好事，我同周秀娜唔同路線，仲可以互相照應。」
吳浩康做中間人
至於簽新公司係咪想轉型做藝人？莊思敏話：「只係想多元化發展，簽經理人公司主要係唔想再俾人拖糧，有人幫我追數同接工作，今次簽呢間公司男友都算係中間人。」
