前日，黃國英同孫柏文一齊做節目《你貼股我教路》。講起大陸經濟時，黃兄提到大陸發電量嘅趨勢，令人對大陸經濟表現產生憂慮。
咁黃兄噚日喺佢專欄《英之見》度，就再講話大陸5月上旬嘅用電量跌幅擴大至3.9%。大家試諗下，國民生產總值GDP，即全國生產量提升嘅話，用電量會加定減？相信大家都會話加。
不過有啲信大陸一定成功「保八」嘅樂觀派，即係嗰啲H股指數過萬點仲追嘅人，就一定唔同意。佢哋會話：「用電量跌咁又點？保八、保八、保八！」
為大家計計數。假設舊年全國用咗100度電，去生產值100蚊嘅產品同服務，今年數據話「保八」成功，全國生產值108蚊嘅嘢，不過只用咗96度電。其他嘅唔好讚，淨係我國用電效率升咁多，從環保角度都可喜可賀！
當然，如果你真係信大陸用電效率升咁多而追入H股嘅話，我有批千禧年dotcom股票你應會有興趣。
專業投資者較信發電量
其實，發電量同GDP數據有出入喺大陸已經唔係第一次出現。九十年代尾，即因亞洲金融風暴對上一次要「保八」，數據話「保八」成功，不過發電量增長遠不及GDP升幅。計數就只可話效率提高。
到千禧年代中，中央話要冷卻經濟時，發電量升幅遠超GDP數據增長。咁又係咪代表中國人用電忽然效率大跌？大家應該心照。當領導壓重注落一個數據時，就千祈唔好靠嗰個數據搵食，會好危險。所以前日我問黃兄佢信GDP定信發電量去反映經濟情況，佢都係答：「專業投資者都係信發電量多啲。」
孫柏文
http://phatdat.blogspot.com