噚日湖南省喺金鐘五星級酒店搞招商，嘉華國際（173）兼銀河娛樂（027）主席呂志和抽空一粒鐘參加畀面派對。仲記得一個月前呂博士因病冇出席銀娛業績記者會，華華即刻走過去，關心佢老人家近況，點知得到嘅答案係：「我冇病呀！」佢仲話，當時代表嘉華親赴上海賣樓，成績仲好好㖭！
「家買股票遲咗啦」
聽完之後，華華當堂打咗個突，因為佢個乖仔、銀娛副主席呂耀東當日向近百名記者講話爸爸唔舒服，冇理由亦冇需要講大話啫。
綜合路邊社消息，呂博士最近真係身體抱恙，不過，佢又的確走咗去上海搵銀，問題係佢講緊去賣樓嘅「嗰日」，係嘉華上月初發佈業績而直情冇搞記者會嗰日。點樣都好，總之呂博士家身體健康就得啦！
最近股市升到㷫烚烚，投資者好似忘記咗百年一遇嘅金融海嘯，呂博士好直接咁話：「買股票遲咗啦，家仲去追？」好多人想問，呢兩日股票又升番，話跌又唔跌，之但係，由07年3萬幾點跌落嚟，起番啲都係應該嘅。