經歷過股價跌到33蚊、供股同減股息之後，噚日滙控（005）行政總裁紀勤首次面對股東，華華喺股東會完結後搵咗幾位股東傾偈，發現男性股東對大笨象嘅不滿大啲，而女股東嘅包容性高啲，股東對於大笨象，就十足嚴父慈母。
紀勤股東會施軟功
紀勤主持非正式股東會時十分識做，先多謝股東支持供股，之後話自己對減少派息都好失望，不過管理層為咗將來審慎發展，希望股東明白……股東吳先生就對股息唔太在意，因為佢揸得唔耐，反而在意股價，因為佢約130蚊買入，可以話係重傷股東。佢話：「第一次嚟股東會，睇吓間行有乜發展，我都係蝕大本。」對一班管理層，佢話：「（管理層）講係咁講，但唔知做唔做到？」
另一位退休不久嘅張生一踏出社會賺錢就買滙控，佢最不滿係今年滙控公佈08年業績盈利倒退七成之前，未有發盈警，「當時滙控由低位回升，一路升，啲人一路入貨，發咗盈警就冇接咁多嘛，我自己都一路有入，入到55蚊。」
不過，另外兩位股東郭女士同李女士都覺得，呢個係時勢嘅錯，唔關大笨象事，郭女士仲好豪氣咁話，股價同派息跌都係正常，唔緊要，有信心第日派息會多番。而股東會上，一名女士更係以阿媽嘅口脗，好言相勸紀勤：「有冇考慮將總部調番香港呢，你哋睇吓個滙控logo，個名有香港同上海嘅字，應該返娘家懷抱……」成個股東會贏得掌聲嘅，就得呢句說話。
李華華
mailto:[email protected]