英超護級戰今季都幾精采，西布朗篤定降班，米杜士堡降咗9成外，侯城同紐卡素終於都搵多一隊落水，就喺自己唔生性嘅「黑貓」新特蘭。
新特蘭周一英超獨腳戲作客對風流波樸茨茅夫，原本贏波就肯定成功護級，和波都好大機會，樸茅更有門神占士因傷缺陣，派個21歲兼之前未打過英超嘅比高域斯守龍，御駕親征嘅新特蘭主席昆尼心諗：「唔通連個天都幫我？」
不敵樸茅玩死自己
「黑貓」嘅堅韋尼鍾斯59分鐘近門射入，昆尼開心到拍爛手掌，點知開心唔夠1分鐘，中後場唔生性，先有中場列比達無端端頭槌回傳，被對手前鋒烏達卡近門射入，追成1:1；68分鐘，中堅安頓費迪南漏踢，益咗烏達卡單刀，右後衞巴士利回防包位嗰陣誤擺烏龍，9分鐘內，新特蘭由3分變1分，最後仲輸埋。
昆尼之後就好心急，頻頻睇錶，不過領隊斯巴基亞就你急我唔急，到80分鐘先換施斯出嚟，但空群出擊，樸茅一次突擊由阿曼特查奧爾埋齋，3:1奠勝。斯巴基亞賽後話：「防守簡直不可接受，安頓費迪南犯咗好差勁嘅錯誤；今季成日都喺咁，打得好都攞唔到分。」
新特蘭周日煞科戰就仍要為護級而戰，講真做得「黑貓」球迷就真係習以為常；英超成立以嚟，新特蘭都算係升降機，07年升班，捱咗兩季唔通下季又要落英冠過冷河？不過新特蘭仍然有主導權，佢比侯城同紐卡素，各領先1分及2分，只要煞科戰贏波就護級成功，不過睇賽程，「黑貓」主場對車仔，贏波？咪玩啦；昆尼同斯巴基亞祈定禱，侯城同紐記唔可以齊齊贏波好過啦。
曼聯出仔門將益侯城？
不過侯城主場對曼聯，曼聯就有門將賓科士打做手指手術缺陣，一向打正選嘅雲達沙又會唔出，留待歐聯先出，對侯城時可能用19歲仔阿蒙斯；唔知昆尼同斯巴基亞聽完呢個消息，會唔會腳都軟埋？