「痛心疾首」四個字，是香港人抗爭20年的集體回憶，也是愛國報人程翔的沉痛心聲。89年為了六四離開北京喉舌《文匯報》，05年為了追尋六四真相被捕下獄，愛國愛到顛沛流離的程翔，向我們述說，六四前後一份黨報與香港左派曾經剎那閃現的人性光輝。
記者：蔡元貴
89年5月21日，北京宣佈戒嚴翌日，《文匯報》社論開天窗，只有一句「痛心疾首」。那一天，在《文匯報》工作了15年的程翔身在北京，直擊八九民運的進程。從這天開始，程翔多次被報館召回香港，他屢次不聽命，直至6月3日，形勢危急，無奈返港。
《文匯報》89年以支持學運的姿態出現，振奮人心。程翔指出，《文匯報》在六四前後的表現，是中國大陸一度「文藝復興」的象徵，「76年後，中共內部有一股力量睇到一黨專政唔掂，好願意改革，趙紫陽同胡耀邦係當中嘅代表，喺佢哋嘅推動下，中國曾經欣欣向榮。任何一個經歷過嗰個時代嘅人，都會同意，80年代初期，中國真係出現過短暫嘅文藝復興，出現前所未有嘅思想同言論自由，包括新聞界，《文匯報》就係喺咁嘅情況之下，由社長李子誦同總編輯金堯如推動改革，嘗試突破框框。」
「加入《文匯》冇後悔」
《文匯報》當年起着率領香港左派支持學運、反對北京鎮壓嘅帶頭作用。程翔說：「能衝破共產黨嘅禁忌，對香港嘅左派來講係非常震撼。」六四後不久，程翔隨着李子誦及金堯如離開報館，他說：「離開《文匯》係好直覺嘅做法，我唔可以講違背良心嘅說話，就係咁簡單。因為北京喺六四後對《文匯》嘅要求，就係轉軚，要返到黨嘅立場。」
《文匯報》在六四後不久開始轉軚，程翔記得，當時有一篇由新華社供稿的報道，讚揚解放軍鎮壓行動。報館被迫刊登這篇報道，李子誦感到很痛苦，唯一可表示不滿的辦法，是在標題上抗議：「諱言群眾遭殺害，聲聲歌頌解放軍。」李子誦是老報人，懂得用筆鬥爭。程翔說：「呢個標題，我一世都記得。」
最近程翔頻頻獲邀出席以六四為題的活動，他說是被迫回憶慘案：「每個有良知嘅中國人，回憶起六四都會傷痛。我喺六四事件幾年之後第一次返北京，坐車經過天安門，我合埋眼唔敢睇，唔想諗番咁痛苦嘅嘢。」
被北京指為間諜、被反共人士指為「老左仔」，兩邊不是人的程翔，1974年加入《文匯報》。他出身名校聖保羅，畢業於香港大學，天之驕子卻選擇了低薪的左報記者職位，幻想服務黨報以貢獻國家。他的解釋是：「基於一種對國家嘅責任，畢業後加入《文匯》，至到家都冇後悔。」
六四影響了程翔一生，外界甚至認為他05至08年在內地被捕及監禁，也是出於六四情結。程翔作出這樣的研判：「六四後，佢哋（北京）一直住我；六四令我從共產黨刻意栽培嘅人變成不友好人士。但係我唔鍾意用情結形容自己對六四嘅感受，好似講到我對個人得失好在意。……我嘅執着，係出於對民族同歷史嘅責任。如果我唔係記者，可能冇咁care（在乎）；作為記者，就要知道發生乜事，唔可以沉默。」