多得鬥噏權，香港又再興起六四熱。講開又講，過咗廿年，六四屠城究竟害死幾多寶貴生命，始終係一個謎。歷來嘅版本係由袁木嘅23到《爭鳴》月刊嘅過萬不等。八方呢日又收到一本《歷史的大爆炸》（圖）嘅六四新書，引述中國紅十字會黨組書記譚雲鶴嘅講法：學生同群眾713人死亡，軍隊14人死亡。
《歷史的大爆炸》作者張萬舒已經年過70，八九民運期間任職新華社北京總社國內新聞部主任，亦做過第六屆全國人大代表。經過中共多年來嘅遮掩磨滅，已經冇可能證實到邊個數字準確。無論死人多少，正如張萬舒所講：「儘管死亡人數沒有海外傳媒估計的那麼多，特別是軍隊死亡者更沒有當局所報的那麼大，但是中國人民特別是知識分子的心靈，同樣遭受了一場歷史性的大創傷！」