臨近季尾，同事仙道彬睇死《早飛倉》結餘返唔到正數，人要面樹要皮，我同畢傑必定趁餘下幾周發力，希望好好睇睇上番正數，今日就重槌日乙嘅東京綠茵主場擊敗岡山綠雉。
綠雉作客唔識踢
東京綠茵前身係川崎讀賣，有番咁上下波齡嘅球迷都知讀賣曾經係亞洲王者，同本地班霸東方都交過手；不過近年水準的確下滑，今季更由日聯降至日乙，但始終老牌勁旅仍有一定號召力。要喺日乙比賽，收入一定減少，綠茵球會總監瑠瑋早前更帶頭減薪，同球會共度時艱咁話；綠茵並未因此沉淪，近4仗取得2勝2和，今仗更有福田健介同服部年宏可望復出，贏波更添信心。
岡山綠雉呢支今季先加入日乙嘅球隊，始終都飛唔起，除咗主場攞過吓分外，聯賽7場作客輸足5場；今仗更有南韓後衞金廣閔停賽，又有妹尾隆佑、臼井仁志同小林康剛等傷兵，今次到東京，呢隻「山雞」預咗俾人劏。
馬模主W串得過
配腳方面，就揀兩場瑞超主場球隊；近期瑞超賽事都幾利主隊，周三3場波嚟講，以咸史達斯主場對加費萊，同馬模主場對奧雷布洛較穩。咸史達斯雖然上仗畀艾夫斯堡大數，不過主場一啲都唔差，近兩場都贏波，而加費萊就一向例牌作客腳軟。另外，馬模一向喺瑞典屬名氣大嘅球隊，主場對奧雷布洛，以馬模今季聯賽主場未輸過走勢，3分都應該穩執，呢條3串1穩陣。文：牽牛
早飛王貼士
星期三13 東京綠茵vs岡山綠雉
首選：東京綠茵勝（1.6）
次選：東京綠茵勝[-1]（2.65）
冷選：東京綠茵勝2:0（7）
早飛倉
主菜：星期三13東京綠茵勝（1.6）@$4,000
渾水換魚過關：星期三13東京綠茵勝（1.6）x星期三22咸史達斯勝（1.62）x星期三23馬模勝（1.8）3x1@$1,000
今日早餐價錢：-$5,000
上日賺蝕：-$2,500
早飛倉結餘：$71,065
規則：$100,000本錢，每日買早報最多動用$5,000，最少$1,000，逢周二、五見報。
周中焦點
星期三24 薩克達vs雲達不來梅
歐協盃決賽，薩克達能否成為首支烏克蘭球隊，贏得歐洲球會盃賽冠軍，就要在土耳其中立場，與有迪亞高停賽缺陣的德國球隊雲達不來梅，決一生死。
星期四14 小保加vs迪芬沙士砵亭
南美自由盃16強次回合，阿根廷傳統班霸小保加，首回合作客與迪芬沙士砵亭踢成2:2，次回合只要不失波便晉級，小保加會攻還是守？