每年農曆五月初五端午節，各食肆紛紛出糉鬥法，戰況激烈過英超。傳統派力撐經典口味，魚翅鮑魚唔少得；創新派搵新食材大玩gimmick，推出番薯、蟲草花這些特別品糉。今年仲大吹和風，日本黑豚、咖喱肉醬、蒲燒鰻魚統統入饌變糉。向來崇日的香港必定失守，大啖入口日本糉。
記者：王震遠
攝影：梁細權、楊錦文、王文忠
黑豚入口鬆化
金紫荊向以精緻粵菜聞名，上年更成為米芝蓮必比登推介餐廳之一。今年端午節推出新糉，棄用上年的魚翅，改用日本黑豚作賣點，將日式元素糅合中式糉內發揮。日本黑豚味道香甜，肉質入口鬆化，不但令糉的味道升級，滲出豐腴的油份，糯米吸收之後自然惹味。中日fusion口味之外，推介仲有以素食的黃耳松茸香素糉，同清甜的棗蓉桂花紅豆糉。而且所有糉都是收柯打先新鮮即包，想食記得早兩日前電話預訂啦。
鮑魚金貝黑豚肉裹蒸糉$128隻
糉的份量大，用上12款食材：日本黑豚肉、鮑魚、瑤柱、靈芝菌及火鴨等。糯米以沙薑粉調味，很香口。
黃耳松茸香素糉$88隻
以菌類做的素糉，黃耳、松茸、榆耳、靈芝菌和黑松露等，滿口素香及松露味。
金紫荊粵菜廳（25827728）
灣仔金紫荊廣場香港會議展覽中心地下
咖喱和風糉
東海堂一向跟貼潮流，見時興北海道牛乳，馬上推出北海道牛乳玉米包。今年端午終於踩入端午糉戰國時代，第一炮推出一系列日式口味糉，用日本咖喱、蒲燒鰻魚、十勝紅豆同北海道元貝等和風十足的食材做餡，款款東洋特色。
日本咖喱肉醬糉$49
咖喱微辣香口，肉碎混入糯米，煙韌又惹味，原粒金栗夠爽，口感似食咖喱飯。
北海道原粒元貝豚糉$89隻
和風味十足，除原粒北海道元貝，仲有豚肉及日本素翅，以台灣葉包，鮮味十足。
蒲燒鰻魚糉$58隻
糯米中混入素翅同櫻花蝦，口感豐富。估唔到燒汁鰻魚同糯米味道好夾，很香口。
東海堂（27391328）
全線分店有售
矜貴品糉
燕窩
燕窩味道清甜，又可養顏。龍皇酒家以燕窩做糉的餡料，推出約六両重的燕窩鹼水糉。用料名貴又應節，買幾隻送畀阿媽、外母實冧。
龍皇酒家飲食集團（28952288）
銅鑼灣告士打道280號世貿中心12樓全層
鮑魚
當人人推出新口味，滿福樓卻反璞歸真，專心做好傳統嘅裹蒸糉，由澳洲鮑魚同瑤柱作餡，即日鮮製，味道鮮美。
滿福樓（27346600）
尖沙嘴梳士巴利道22號4樓九龍萬麗酒店
花膠
名貴食材又點少得養顏滋補的花膠。蛋撻王新推花膠八寶糉王，以特大花膠做糉餡。此外，仲有北海道元貝、腩肉、乾蝦、冬菇、蓮子、綠豆和鹹蛋黃，糉子雖小，八寶俱全。
蛋撻王（27900090）
全線分店有售
海參、魚翅
逸東軒推出帝皇裹蒸糉，原本為皇帝御食。貴價食材有鮑魚、瑤柱，再加北菇同燒鵝夠惹味，爽滑海參做糉餡夠特別，仲有魚翅攝吓牙罅。
逸東軒（27101093）
佐敦彌敦道380號逸東酒店低層2字
特別品糉
番薯
日本風吹不停，鴻星都以日本番薯炮製出另類新口味甜糉。日本番薯出名香甜，入口軟滑。
蟲草花
藥膳入糉！除有淮山同杞子外，主角水鴨性微寒而無毒，脂肪較少，利水消腫。蟲草花為人工培植蟲草，可滋肺補腎、提升免疫力，呢個時勢最啱食。
鴻星海鮮酒家（26280080）
全線分店有售
甘桔
甘桔都可以做糉！翠亨邨再度推出首創的「金桔鹼水糉」，以新鮮甘桔製成茸，一級糯米中散發出甘桔果香，甘桔醬同食。酸咪咪，新口味。
翠亨邨（23762882）
尖沙嘴彌敦道132號美麗華商場地下
