「股壇長毛」DavidWebb久唔久就爆大鑊，但佢嘅個人網站webb-site.com，由98年成立至今都係異常簡約，噚日終於大變身，新版本pro好多，最有gimmick係網頁右邊新增嘅「今日壽星」一欄，排頭位係144歲冥壽嘅MakSauYing，即係「賭王」何鴻燊長輩、何東爵士夫人麥秀英，真係有眼不識泰山！
Webb同華華講，佢喺網頁上載咗本港開埠以來過萬位達官貴人嘅生日資料，遲啲會加埋90年至今本港上市公司董事名冊，如果個別人士身兼多職，一搜查就現晒形，有乜利益轇轕根本冇得避。至於新網頁使咗幾多錢開發，Webb話計唔掂數，因為搞咗好多年，之不過，網民可以更易監察企業管治水平，幾揼本都值得。